Jos 24 | ZomZIV | STEP | Tua ciangin Joshua in Shechem ah Israel behte khempeuh a khawm hi. Amah in Israel upate, makaite, thukhente le uliante sam-a, amaute in Pasian mai ah kipulak ciat uh hi.

Joshua 24

Shechem ah Thukhun Kithaksuaksak

1 Tua ciangin Joshua in Shechem ah Israel behte khempeuh a khawm hi. Amah in Israel upate, makaite, thukhente le uliante sam-a, amaute in Pasian mai ah kipulak ciat uh hi. ^a

2 Joshua in mi khempeuh tungah, “Hih in TOPA, Israel Pasian gen ahi hi: ‘Tanglai pekpekin na pate uh Abraham le Nahor-te pa Terah mahmah zong Gunpi ^{▼▼24.2 Tua in Euphrates tg. 3,14, 15 ah zong} galah tengin pasian dangte a bia uh hi. 3 Ahi hangin Gunpi gal panin na pa uh Abraham ka sama, Canaan gamah vakpih kawikawi-in ama suante tampi ka phasak hi. Ama tungah Isaac ka pia a, 4 Isaac tungah Jacob le Esau ka pia hi. Seir mualtung gam teng Esau ka pia a, ahi hangin Jacob le a tapate Egypt ah paisuk uh hi.

5 “‘Tua ciangin Moses le Aaron ka sawla, tua muna ka hihsa bangin Egypt-te ka gawt-a, note kong paikhiatpih hi. 6 Na pate uh Egypt pan ka paikhiatpih ciangin tuipi ciang na tung uh a, Egypt-te in amaute sakol tungtuangte ^{▼▼24.6 Ahikeh sakol tungtuangte} le sakol-lengin San Tuipi ^{▼▼24.6 Hebrew in Yam Suph; tua in Pumpeng Tuipi cihna} dong a nungdelh uh hi. 7 Ahi hangin amaute in TOPA huh ding ngen uh a, amah in no le Egypt-te kikalah khuamial a koih hi; amaute tuipi tuumsakin tuamcipsak hi. Egypt-te tungah ka hihsa na mit mahmah uh tawh na muhsa uh ahi hi. Tua ciangin sehnel gamah sawtveipi na teng uh hi.

8 “‘Jordan nisuahna lama teng Amor-te gamah kong tunpih hi. Amaute in no hong do uh hangin no khut sungah amaute kong pia hi. Note mai-ah amaute ka susia-a, amaute gam na la uh hi. 9 Israel do dingin Moab kumpipa Zippor’ tapa Balak kithawi a, note hong hamsiat dingin Beor’ tapa Balaam a vaikhak hi. 10 Ahi hangin Balaam thu ka ngai kei a, tua ciangin amah in note thupha hong pia phapha in ama khut panin note kong hukhia hi. ^e

11 “‘Tua ciangin Jordan na galkah uh a, Jericho na tung uh hi. Jericho khua mite in hong do uh a, tua mah bangin Amor-te, Periz-te, Canaan-te, Hit-te, Girgiash-te, Hiv-te le Jebus-te in zong hong do uh hi; ahi hangin amaute no khut sungah kong pia hi. 12 Note mai ah tunpi ka sawl-a, note mai panin amaute ka hawlkhia a - Amor-te kumpite nih zong tuate in a hawlkhia hi. Na namsau uh le na thal uh tawh na simsa uh hi lo hi. 13 Tua bangin no gimna loin gam kong pia a, no lam lohin khuapite kong pia hi; tuate sungah na teng uh a, na suan loh uh lenggui huan pan le olive lo panin na ne uh hi,’ ci hi. ^f

14 “Tu-in TOPA kihta in na muanhuai theih tawpun ama na sem un. Gunpi gal le Egypt a na pute uh biak pasiante paimang unla TOPA’ na sem un. 15 Ahi hangin TOPA nasep nuam na sak tuak kei uh leh gunpi gala na pute uh pasiante le amau gama na tenna uh Amor-te pasiante’ na koizaw sem ding na hi uh hiam tuni mahmah in teel un. Ahi hangin kei le ka innkuanpihte in ahileh TOPA na ka sem ding uh hi,” a ci hi. ^g

16 Tua ciangin mite in, “TOPA taisan in pasian dangte na ka sem peuhmah kei ding uh hi! 17 Saltanna gam Egypt panin eite le i pute hong paikhiatpih a, eite mitmuhin lim lianpi a bawl, TOPA eite Pasian mahmah ahi hi. Amah in eite khualzinna buppi, minamte khempeuh laka i zinna ah hong dal hi. 18 Tua hi-a minamte khempeuh a gam sunga teng Amor-te tawh eite mai panin TOPA in a nawhkhiat ahi hi. Amah eite Pasian ahi manin kote in zong TOPA na ka sem ding uh hi,” a ci uh hi.

19 Joshua in mipite tungah, “Note in TOPA na na sem thei kei ding uh hi. Amah a siangtho Pasian hi a; a aam Pasian ahi hi. Amah in na lehdona uh le na mawhnate uh hong maisak lo ding hi. 20 TOPA taisanin gamdang pasiante’ na na sep uh leh note tungah hong migit khit ciangin hong lehngatsanin siatna hong tungsak dinga hong beisak ding hi,” a ci hi.

21 Ahi hangin mite in Joshua kiangah, “Hi kei! TOPA na ka sem ding uh hi,” a ci uh hi.

22 Tua ciangin Joshua in, “TOPA na sep ding na teelna uh no le no teci na hi uh hi,” a ci hi. ^h

“Hi hi, kote teci ka hi uh hi,” ci-in a dawng uh hi. ⁱ

23 Joshua in, “Tua ahileh tu-in note laka om gamdang pasiante paimang unla TOPA Israel Pasian tungah na lungsimte uh ap un,” a ci hi. ^j

24 Tua ciangin mite in Joshua tungah, “Kote in TOPA kote Pasian na ka sem ding uh a, ama thu ka mang ding uh hi,” a ci uh hi. ^k

25 Tua ni-in Joshua in mite adingin thukhun khat bawla Shechem mah ah amaute adingin thukipte le thukhamte a gualhsak hi. 26 Tuateh Joshua in hih nate Pasian Thukham Laibu sungah a ciamteh hi. Tua ciangin amah in suang lianpi khat la a, TOPA munsiangtho kiang tawsaw nuai-ah a phut hi. ^l

27 Amah in mite khempeuh tungah, “En un! Hih suang eite langah teci ahi hi. Eite tunga TOPA hong gente khempeuh hih in za khin hi. Na Pasian uh tungah na thumaan kei uh leh note langkhat ah hih in teci ahi hi,” a ci hi. ^m

Khapsa Gamah Kivui

28 Tua ciangin Joshua in mite amau gouluahna ciatah a ciahsak hi.

29 Hih teng khit ciangin TOPA nasempa Nun’ tapa Joshua si a, amah kum za le sawmkhat a pha hi. 30 Tuateh amaute in ama luahna gam Gaash Vum leilu-lam Ephraim mualtung gama Timnah Serah ^{▼▼24.30 Timnath Heres a zong a kithei (Thk.2:9 en in)} ah a vui uh hi.

31 Joshua a nuntak hun sung le amah sanga sawt a nungtazaw upate nuntak hun sung teng Israel in TOPA na sema, amaute in, TOPA in Israel adingin a sep khempeuh a thei uh hi.

32 Tuateh Israel-te in Egypt pana a puak toh uh Joseph’ guhte, Shechem’ pa Hamor’ tapate tung panin Jacob in nguntang ^{▼▼24.32 Hebrew ah kesitah za khat kesitah khat pen a gihna le aman zah a kithei lo sum ahi hi.} zakhat-a, a leina leikhawk ah a vui uh hi. Hih mun Joseph suante gouluah a suak hi.

33 Tuateh Aaron’ tapa Eleazar si-a, Ephraim mualtung gama a tapa Phinehas sehtanhna Gibeah ah kivui hi.